Ponte Caldelas ultima os detalles do proxecto da estación termal que se construirá nos terreos do vello balneario. Será presentado nos próximos días, pero antes o goberno municipal quixo arrombar a estrada de acceso e a finca na que se atopa.
Así, no interior da finca rozouse con tractores a maleza e as especies invasoras que se acumulaban, sobre todo mimosa, e que asoballaban o terreo. En canto á estrada do balneario, cortáronse as mimosas que medraban sobre a marxe esquerda da estrada.
A estación termal, que Ponte Caldelas quere financiar con fondos europeos, será un edificio "sostible, eficiente, integrado no entorno e moi fermoso", segundo o alcalde.
Andrés Díaz defende que "petarei en todas as portas e non pararei ata conseguir que Ponte Caldelas recupere o prestixio termal que nunca debeu perder".
O proxecto, engadiu o rexedor, será "modesto e respectuoso cos valores naturais" do ámbito no que se atopa e, ao mesmo tempo, o "impulso turístico" que precisa o municipio.
"Será un gran potencial en todos os eidos para Ponte Caldelas, un espazo clave para o futuro turístico e económico do noso pobo", avanzou Díaz.