Durante a mañá deste sábado, 600 persoas fixeron cola baixo a choiva no Porto de Vilagarcía para visitar o buque emblema do Greenpeace, o Rainbow Warrior 3. Ao longo da xornada do sábado, a organización agardaba alcanzar as 1.500 visitas.
E este domingo 28 continuará a xornada de portas abertas para que todas as persoas que queiran subir a bordo comproben as excelencias deste barco, que foi financiado grazas ás persoas asociadas á organización ecoloxista. O horario será de 10.00 a 14.00 horas e de 17.00 a 21.00 horas.
Esta estancia en Vilagarcía de Arousa é consecuencia cos problemas coa Autoridade Portuaria de Vigo para recalar nas instalacións olívicas durante a campaña que está a emprender a organización non gubernamental na que tenta sensibilizar á cidadanía en relación coa crise climática e demandar un cambio do sistema enerxético para frear o cambio climático.
Os representantes de Greenpeace lembran que o mes de xuño foi o máis caloroso da historia do planeta e fan un chamamento á unión para frear o desastre ecolóxico.
Durante a súa presenza no porto de Vilagarcía de Arousa realízanse diversas actividades relacionadas coas enerxías renovables. Este domingo, a partir das 21.30 horas na Praza da Segunda República está previsto un concerto con Maika Makovski, Depedro e Uxía.
Durante a mañá do martes 30, o emblemático barco partirá cara á Illa de Arousa, onde a tripulación apoiará o proxecto europeo de transición enerxética en illas que se está desenvolvendo nesta contorna natural.
Engade Pontevedra Viva como fonte preferida de Google de balde
Mantente informado coas últimas noticias de actualidade.