Luís López e Miguel Anxo Fernández Lores volveron verse as caras. Foi para a firma de dous novos convenios, correspondentes ao ano 2025, polos que a Deputación achegará 2 millóns de euros para executar diversas actuacións en Pontevedra.
A través dos convenios asinados este mércores polo presidente da Deputación e o alcalde de Pontevedra, o goberno provincial sufragará os 370.000 euros que custará a reforma prevista na rúa Luís Seoane, deseñada para mellorar a accesibilidade neste viario sen saída.
A eles sumaranse 1,6 millóns para contribuír, xunto co Concello -que pon outros 700.000 euros-, á actuación municipal que permitirá renovar a iluminación pública en toda a zona norte e leste da cidade, con especial incidencia nos barrios da Parda e Valdecorvos.
López destacou que se trata de dúas actuacións que o municipio da capital "en base a súa autonomía local" quixo impulsar en colaboración coa Deputación e que, segundo engadiu, "son feitos contables que certifican a liña de entendemento" entre ambas as institucións.
"É o que nos piden os veciños e estamos a darlle cumprimento", destacou o presidente provincial, que defendeu o investimento que o seu goberno realiza en Pontevedra e que cifrou en "máis dun millón de euros" cada mes, 30 millóns en 28 meses de mandato.
Dentro dese investimento, Luís López incluíu, entre outras partidas, 16,4 millóns investidos no Museo, 1,6 millóns para recuperar a Bienal, 1,7 millóns para reformar a estrada de Tomeza a Figueirido ou os recursos para apoiar a entidades deportivas, culturais ou veciñais.
Asegurou, a este respecto, que "entendo perfectamente" que os alcaldes, como fixo o de Pontevedra de maneira reiterada, "sempre esixan máis", pero sostivo que moitos rexedores "me trasladan que oxalá a Deputación investira estes 30 millóns nos seus concellos".
De cara a 2026, ademais de asinar novos convenios para incluír os 2,5 millóns anuais que a Deputación concede a Pontevedra, López avanzou que se contemplarán 300.000 euros máis para os Feroz 2026 e 100.000 euros para a gran final das Series Mundiais de tríatlon.
"A da colaboración e o entendemento coas administracións é a liña que debemos seguir porque así nolo reclaman os veciños e só pensamos en seguir colaborando coa cidade de Pontevedra. Pola nosa parte non se vai a perder", sentenciou o dirixente provincial.
Fernández Lores, pola súa banda, destacou que as obras cubertas polos convenios asinados este mércores son "importantes e necesarias" para a cidade de Pontevedra e que xa se atopan en proceso de licitación.
Sobre a contía do investimento provincial na cidade, o alcalde reiterou que non descarta a posibilidade de haxa "algún tipo de incremento" no futuro para compensar as contas.
Lembrou que Pontevedra é a capital da provincia e aínda que entende que a Deputación debe ter "maiores compromisos económicos" cos municipios máis pequenos, confía en que o Concello poida recibir un "pequeno incremento" para outro tipo de actuacións.
Engade Pontevedra Viva como fonte preferida de Google de balde
Mantente informado coas últimas noticias de actualidade.