Pontevedra quere que o seu modelo urbano sirva de referente para a redacción da nova normativa de Tráfico a nivel nacional. Así llo trasladou o alcalde, Miguel Anxo Fernández Lores, a Javier Villalba, xefe da Unidade de Ordenación Normativa da DXT, no encontro que ambos tiveron en Madrid.
Durante a entrevista, que Fernández Lores mantivo como presidente da rede Cidades que Camiñan, ambos os dous dirixentes mostraron unha "gran sintonía", segundo trasladaron desde o goberno municipal pontevedrés.
"Agardamos que todas as propostas que fixemos sexan incluídas no regulamento", explicou a concelleira de Promoción da cidade, Anabel Gulías, que lembrou que estas suxerencias son "froito de medidas probadas" e que, ao seu xuízo, tiveron "moito éxito".
Pontevedra, engadiu Gulías, é desde unha perspectiva global "o mellor exemplo de que estas medidas funcionan".
Entre outras cuestións, o alcalde pediu á DXT que se recolla na nova normativa de Tráfico que os 'lombos' son elementos redutores de velocidade e non obstáculos na calzada e que autorice aos titulares das vías para elaborar a súa propia normativa para regulalos.
Ademais, Lores reclama que se defina unha velocidade máis moderada nas vías convencionais nas que haxa tráfico peonil e que nas zonas urbanas se reduza a velocidade máxima e, por orde da DXT, pase de 50 a 30 quilómetros por hora.
Nas rúas de prioridade peonil, Pontevedra propón a Tráfico que se adopte a mesma solución que na Boa Vila, limitándoas a 10 quilómetros por hora para todo tipo de vehículos e que se protexa aínda máis os arredores dos centros escolares.
Pontevedra reclamou formalmente que se restrinxa o uso das beirarrúas aos peóns, prohibindo o paso por ela de monopatines, bicicletas ou vehículos de mobilidade persoal, coa única excepción dos que utilizan as persoas con mobilidade reducida.
De forma "anecdótica", explicou Gulías, o alcalde de Pontevedra pediu tamén que o sinal de perigo que alerta da proximidade dun colexio non se reflicta coa imaxe dos nenos, porque "o perigo non son os nenos senón os coches".
Engade Pontevedra Viva como fonte preferida de Google de balde
Mantente informado coas últimas noticias de actualidade.