Aínda que xa leva preto dunha semana en uso, non foi ata este sábado 15 de abril cando a área de autocaravanas habilitada na cidade do Lérez foi inaugurada oficialmente.
En presenza dos 160 autocaravanistas que acudiron á concentración convocada pola Asociación Galega de Autocaravanas, o alcalde de Pontevedra, Miguel Anxo Fernández Lores recoñeceu que este proxecto era "unha espiña que tiñamos cravada".
"Para min foi unha gran sorpresa a asistencia a estas xornadas e a esta inauguración, contabamos con que había moita demanda pero non tanta", sinalou o rexedor da capital.
A pesar de que a área de autocaravanas dispón de 20 prazas, estes días poden verse moitos máis vehículos deste tipo na contorna da Illa das Esculturas, copando por completo o aparcadoiro disuasorio creado ao seu lado e tamén nas rúas contiguas como a Avenida de Bos Aires ou Xosé Malvar.
"Fixemos a área que quixo a federación de campers e autocaravanas", explicou Lores na inauguración atendendo ao tamaño que solicitou o colectivo "aínda que eu creo que vai a quedar pequena", augurou.
O encontro de caravanistas afronta este sábado a súa última xornada antes de despedirse da cidade coincidindo co final da Semana Santa.