O presidente da Deputación de Pontevedra, Luís López, presentou este venres os principais obxectivos e liñas de traballo do goberno provincial para 2026, un ano no que, segundo explicou, o apoio aos 61 concellos seguirá sendo o eixo central da acción política.
López defendeu un modelo de xestión "baseado en escoitar, entender e atender" aos concellos, coa intención de manter unha actuación equilibrada no conxunto do territorio.
Entre as prioridades fixadas para o novo exercicio figuran a continuidade do modelo de turismo sostible, o reforzo da provincia como espazo vinculado ao deporte e o mantemento de políticas de colaboración co tecido asociativo.
A iso súmanse investimentos en infraestruturas, benestar social e cultura, así como o impulso a proxectos considerados estratéxicos, como o Museo de Pontevedra, o conxunto patrimonial de Santa Clara, os edificios centrais do Museo ou a futura Vía Verde.
Tras a reunión da Xunta de Goberno, López avanzou que a Deputación prevé alcanzar en 2026 o limiar de 1.400 actuacións a través de plans de investimento, convenios coas cidades, melloras en infraestruturas e obras de xestión directa.
"Non somos a Deputación de dúas cidades nin de 59 pequenos concellos, senón de toda a provincia", subliñou.
En materia turística, o presidente recoñeceu que aínda se descoñece si en 2026 superarase a cifra de dous millóns de visitantes, pero sinalou como obxectivo incrementar o peso do turismo internacional e avanzar na descentralización dos fluxos e na sustentabilidade do modelo.
No ámbito deportivo, a previsión pasa por acometer máis de 200 actuacións de modernización en instalacións, conceder máis de 400 axudas a deportistas, manter o apoio a clubs de todos os niveis e atraer novos eventos de carácter internacional.
A acción comunitaria e social ocupa tamén un espazo relevante na planificación. Segundo os datos achegados, a Deputación aspira a superar o milleiro de colectivos atendidos e os 11 millóns de euros distribuídos durante a primeira metade do mandato.
En benestar social, anunciouse un investimento de 5,7 millóns de euros no centro Príncipe Felipe, a máis elevada dos últimos anos, xunto á posta en marcha de novos programas dirixidos a entidades sociais da provincia.
No apartado de infraestruturas viarias, o orzamento reservado para 2026 rolda os 40 millóns de euros, o que supón un incremento de cerca do 50 % respecto ao exercicio anterior, co obxectivo de manter e mellorar a rede de estradas de titularidade provincial.
En cultura, a Deputación destinará 17,3 millóns de euros, coa vista posta en consolidar iniciativas como a nova Bienal de Artes Vivas, avanzar na rehabilitación do Cine Fraga de Vigo e ampliar os programas culturais no conxunto do territorio.
Entre os proxectos concretos, López referiuse ao Museo de Pontevedra, onde confía en que a exhibición de "A derradeira lección do mestre", de Castelao, atraia un número significativo de visitantes.
Para o antigo convento de Santa Clara e os edificios centrais do Museo, o obxectivo inmediato é executar as catas arqueolóxicas e obter os permisos municipais necesarios para continuar coa rehabilitación.
A Vía Verde foi outro dos asuntos destacados. A curto prazo, a Deputación prevé asinar un convenio con Adif para a cesión dos terreos entre Soutomaior e Pontevedra, paso previo á redacción do proxecto, sen renunciar ao obxectivo final de conectar Vigo e Vilagarcía.
O presidente pechou a súa intervención aludindo a reivindicacións que a Deputación seguirá defendendo ante outras administracións, como a transferencia e gratuidade da AP-9, melloras nas conexións ferroviarias de alta velocidade e de mercadorías, un plan para as estradas nacionais que atravesan a provincia e un sistema de financiamento municipal que teña en conta as particularidades do territorio.
Un conxunto de demandas que, segundo López, seguirán formando parte da axenda institucional en 2026.