Máis de duascentas mil ostras planas para rexenerar a enseada de San Simón

As mariscadoras da confraría de pescadores de Arcade recibiron máis de 200.000 unidades de semente de ostra plana para rexenerar os bancos da enseada de San Simón.

Esta restauración, que supervisou este martes a conselleira do Mar, Marta Villaverde, tivo como escenario o río Alvedosas, unha zona catalogada historicamente pola súa alta produtividade e excelencia para este bivalvo.

A semente entregada, de tres milímetros de talla media, chegou a mans do sector tras completar un preciso circuíto de investigación e coidado biolóxico.

Os exemplares reprodutores adultos, orixinais de Arcade, foron trasladados inicialmente ao laboratorio do centro de cultivos mariños do Centro de Investigacións Mariñas de Galicia (CIMA) de Ribadeo.

Alí induciuse a súa posta nun ambiente estéril e controlado, libre do parásito da bonamiose que chegou a extinguir o recurso nas últimas décadas do século XX.

Tras estabilizarse e alcanzar o tamaño óptimo no criadeiro de Lugo, os lotes de semente regresaron á ría de Vigo para ser confinados polo colectivo de mariscadoras a pé en liñas de cultivo e cestos de plástico intermareais.

A estabulación e preengorde nestas cestas suspendidas na auga optimiza o crecemento do marisco ao garantir unha osixenación e alimentación constantes mediante fitoplancto, á vez que protexe as crías dos depredadores do fondo.

O sistema tamén permite facer fronte ao actual desafío ambiental e ás drásticas baixadas de salinidade polas choivas intensas do inverno.

Esta acción está incluída no proxecto 'Ostreares', deseñado co obxectivo prioritario de recuperar a biodiversidade e os históricos bancos naturais da enseada de San Simón, situada no fondo da ría de Vigo.

O plan de rexeneración abarca a un total de dez bancos marisqueiros, situados entre a caseta do Ceboleiro e a coñecida como Pedra dos Caralletes.

Nelas, ademais do semicultivo de ostra plana, executaranse plantacións de máis de 800.000 ameixas, labores de rareo e traslados selectivos, así como tarefas intensivas de retirada e control de depredadores.