O goberno municipal de Marín continúa avanzando no seu plan para controlar as colonias felinas na vila.
Así, durante os últimos meses, máis de sesenta gatos e gatas foron esterilizados, vacinados e rexistrados polos responsables deste servizo.
As colonias identificadas están por distintos puntos do municipio, pero o Concello estivo a prestarlle unha especial atención á de Méndez Núñez - Fondo do Saco.
Alí, segundo a edil Mónica Viqueira, "apenas nos quedan tres gatos machos por castrar".
A maiores, os traballos deste plan estendéronse ás colonias do Forte, Fonte do Este, Fonte do Leste, San Xián, Coirados, Inferniño, Cividanes - A Dichosa, A Laxe, Outeiro, nas hortas urbanas do Sequelo e en Fontán ou nas dúas que hai preto do cemiterio.
Aínda que antes xa se viña actuando, como por exemplo na Cañota, o proceso de esterilización acelerouse grazas á colaboración da Deputación de Pontevedra.
Este traballo conxunto comezou en outubro e facilita as gaiolas necesarias para a captura dos gatos para levalos ao CAAN, o centro de atención de animais de Armenteira, para castralos e despois devolvelos á súa colonia.
Todo isto "sería imposible", recoñece Viqueira, sen a axuda das persoas voluntarias que participan nas capturas, pero que tamén se están a encargar da alimentación controlada e ordenada das colonias. Para iso, contaron con 150 quilos de penso.
O obxectivo do goberno municipal é continuar co control das colonias, formalizalas, tratar de evitar aumentos de poboación con novas camadas e garantir a seguridade e a salubridade dos gatos.