O cambio a LED na iluminación pública do rural pontevedrés segue avanzando. Marcón e Mourente serán as dúas próximas parroquias en abordar esta actuación de eficiencia enerxética, segundo avanzou este luns o goberno municipal.
En concreto, investiranse 1,4 millóns de euros para substituír 2.088 luminarias e 41 cadros de mandos. O contrato, que sae agora a licitación en busca da empresa que acometerá este cambio de tecnoloxía, recolle un prazo de execución de catro meses e medio.
Ademais da redución na contaminación lumínica, este investimento permitirá reducir o consumo enerxético desta iluminación. Estímase un aforro do 70%.
Marcón e Mourente sumaranse así ás parroquias que xa substituíron a súa iluminación, que son Bora, A Canicouva, Ponte Sampaio e Lourizán.
No caso de Santa María de Xeve, Santo André de Xeve e Verducido, o contrato para a renovación da súa iluminación pública exterior atópase tamén en licitación.