Marcos da Portela triunfa nunha animada Festa dos Maios

Como marca a tradición, cada 1 de maio, o aroma ao 'fiuncho' e as vistosas coroas de flores tomaron a Praza da Ferrería de Pontevedra.

Foi cunha nova edición da Festa dos Maios, na que participaron cinco agrupacións, as que representaban ás comunidades educativas de Froebel, Campolongo, Marcos da Portela, Marcón e Campañó.

A gran triunfadora do certame foi a proposta presentada polos participantes do colexio Marcos da Portela, que levaron o primeiro premio en tres categorías.

Seus foron os galardóns ao mellor 'maio', mellor cantiga e mellor interpretación, o que sumado ao terceiro posto na categoría de coroa reportoulles 1.300 euros en premios.

A figura conmemorativa destas Festa dos Maios foi tamén para eles.

Os únicos premios que se lles escaparon foron os de mellor coroa, que foi a que presentou o 'maio' de Marcón e o premio especial do xurado, dotado con 300 euros, que foi para o 'maio' creado pola comunidade de Campañó.

Esta Festa dos Maios, á que se achegou o alcalde de Pontevedra, Miguel Anxo Fernández Lores, para desexar sorte aos participantes, logrou unha concorrida asistencia.

O pregón correu a cargo da actriz e directora teatral Andrea Bayer, responsable da compañía Baobab Teatro, que foi a encargada de dar a benvida ao 'maio'.