Un simulacro de colisión dun buque de pasaxe na ría de Pontevedra puxo este xoves a proba os medios de emerxencia que coordina a Autoridade Portuaria de Marín.
No exercicio, que se executou en augas próximas á illa de Tambo, ademais da resposta á propia colisión, probouse o protocolo de evacuación dun ferido.
O simulacro consistiu na colisión dunha embarcación de pasaxe cun obxecto que se atopaba entre augas a media milla ao sur do faro de Teno Chico.
Entre os 25 supostos pasaxeiros, había dous feridos, un leve que requiría evacuación en padiola por mar e outro pasaxeiro que necesitaba evacuación aérea.
Debido á colisión producíase unha vía de auga e, ante o risco de afundimento había que tomar medidas para a protección dos 23 pasaxeiros restantes con auxilio dun remolcador e bombas de achique.
O obxectivo deste tipo de simulacros é reducir ao mínimo os efectos dunha emerxencia, especialmente no que respecta a salvar vidas, minimizar impactos ambientais e manter as operacións do recinto portuario.
No simulacro participaron Gardacostas de Galicia co helicóptero Pesca 1, o buque Irmáns García Nodal de Salvamento Marítimo e a súa embarcación auxiliar de rescate rápido, a patrulleira Mar de Galicia, o 112 Galicia ou a Capitanía Marítima de Vigo
A eles sumáronse o Centro de Coordinación de Salvamento Marítimo de Vigo, a Salvamar Mirach con base en Cangas e a Autoridade Portuaria, a navieira Mar de Ons coa embarcación Mar Sálvora e dous remolcadores da asociación Amase Marín.
Tamén colaboraron diferentes forzas e corpos de seguridade do Estado, entre elas o servizo marítimo e o servizo de resgardo da Garda Civil.
O plan de emerxencia interior e de autoprotección do porto é fundamental, segundo a Autoridade Portuaria, para a actuación coordinada e eficaz de todos os axentes que interveñen ante un sinistro destas características.