A directora xeral de Tráfico, María Seguí, visitará Pontevedra o próximo mes de febreiro para coñecer o modelo urbano da cidade e as solucións que se aplicaron en materia de mobilidade. Así o anunciou este luns, Miguel Anxo Fernández Lores. Seguirá así os pasos do seu antecesor no cargo, Pere Navarro, que estivo en Pontevedra en decembro de 2011.
Esta futura visita concretouse a finais da semana pasada en Torrevieja, cidade á que acudiu o rexedor para participar no III Encontro de Cidades para a Seguridade Vial e a Mobilidade Sostible.
Durante estas xornadas, ambos os dous estiveron a falar durante "bastante tempo", segundo Fernández Lores e acordaron esta visita ante o interese mostrado por María Seguí por acudir a Pontevedra, cuxo modelo foi exposto de xeito global durante estas conferencias.
Neste sentido, o alcalde de Pontevedra sinalou que a súa presenza na localidade alicantina foi "fructífera" para dar a coñecer a cidade e un modelo urbano, dixo, "que xa é referencia a todos os niveis". Asegurou que, entre outros, recibiu as felicitacións dos representantes de cidades como Oviedo e Madrid.
Ademais, Fernández Lores comunicou a María Seguí a disposición de Pontevedra para acoller en 2016 a cuarta edición deste foro de seguridade vial e mobilidade.