Marica Adrio, candidata do PSOE ao Congreso por Pontevedra, repartía este sábado material electoral na Praza de España e tamén no mercado ambulante da Alameda.
Durante o seu percorrido, acompañada por outros integrantes da agrupación socialista de Pontevedra, entre os que se atopaba o portavoz municipal Iván Puentes, Marica Adrio destacou a vontade progresista do goberno de Pedro Sánchez.
Neste sentido destacou que o goberno socialista devolvese aos pensionistas os dereitos que perderan debido a gobernos da dereita. Indicou que unhas 20.000 persoas do Concello de Pontevedra e 250.000 na provincia están a se beneficiar da revalorización do 8,5% das pensións, grazas ás medidas adoptadas polo goberno de Pedro Sánchez.
Resaltou tamén o incremento da pensión media en máis de 100 euros mensuais. Avogou pola "decisión firme" do PSOE de blindar o poder adquisitivo das pensións cun cambio constitucional.
Indicou que os futuros pensionistas, en especial os máis novos, serán os máis beneficiados da eliminación do factor de sostibilidade que cernaba o seu dereito a unha pensión digna. Indicando que co PP, que se opuxo a todas as reformas, a xente nova habería perdido unha media de 300 euros mensuais na súa futura pensión.