Este mércores, o Concello de Marín anunciaba o inicio nun breve prazo dunha actuación integral sobre o camiño de Arealonga-O Marco, na parroquia de San Xulián.
A Concellería de Medio Rural informa de que se mellorarán as condicións de habitabilidade desta zona, grazas á renovación dos servizos municipais de saneamento, abastecemento e accesibilidade.
A intervención no saneamento consistirá na instalación das tubaxes adicadas a estes fins, que conectarán coas acometidas domiciliarias residuais separativas e de abastecemento.
Así mesmo, renovarase o pavimento desta estrada e realizarase unha roza e limpeza de todo o terreo, retirando a maleza e o material de refugallo que se poida atopar.
Este proxecto xa está adxudicado á empresa Construcciones Vale SL por un importe total de 37.954,56 euros (IVE incluído), que terá un prazo máximo de execución de dous meses.
O concelleiro de Medio Rural, Pablo Novas, considera "moi importante" a realización desta obra, "dado que dotará, como non podía ser doutra forma, a esta zona dos servizos básicos e de alta calidade que debemos ofrecer desde o Concello".