O Concello de Marín vén de poñer en marcha unha nova campaña de limpeza e conservación dos seus ríos, co obxectivo de protexer os ecosistemas fluviais e garantir o seu bo estado ambiental.
Esta iniciativa, que se vén realizando dende hai varios anos, é tamén clave para previr problemas nas épocas de chuvias e crecidas.
Os traballos que se están a realizar inclúen a limpeza da maleza nas marxes e fondos dos ríos, así como a retirada de troncos, plásticos e outros residuos que poidan afectar ao curso da auga ou danar o medio ambiente.
Aqueles troncos que non se poidan triturar serán recollidos e trasladados a un punto de vertido autorizado.
As actuacións van desenvolverse en varios puntos do municipio como o río Lameira, dende a ponte Zapal ata a ponte de Coirados, incluíndo o regato que pasa detrás do colexio Sequelo. Tamén no río da Grela, dende a ponte de Coirados ata o lavadoiro da Presa.
Do mesmo xeito está previsto actuar no río da Laxe, dende a ponte do camiño do Peso ata a zona detrás do supermercado Mercadona, incluíndo a recollida de canas no noiro do colexio A Laxe, e no río Lapamán, dende a estrada xeral ata o camiño.
Por último, o Concello acometerá a limpeza do río Castiñeiras, dende o lavadoiro de Coirados ata o muíño antigo na zona de A Roza.
Todo este traballo está a ser realizado por persoal especializado en xestión de espazos fluviais e piscícolas, o que garante unha intervención cuidadosa e respectuosa co medio.
O concelleiro de Medio Rural, Pablo Novas, visitou este xoves a zona do río Lameira, onde xa se están levando a cabo os primeiros traballos por parte da empresa adxudicataria. Durante a visita, Novas destacou que esta actuación "é fundamental para preservar a saúde dos nosos ríos e previr posibles riscos ambientais".
O investimento destinado a este plan integral de limpeza é de case 14.000 euros.