O Concello de Marín xa está a traballar na organización do Entroido. As datas están marcadas no calendario e os motores da festa xa quentan para unha das celebracións máis esperadas do ano, que se desenvolverá do 13 ao 18 de febreiro cunha programación chea de cor, música e moita troula.
A concelleira de Festas, Marián Sanmartín, reuniuse estes días coas entidades e asociacións participantes para ultimar detalles, coordinar a organización e dar luz verde ás bases que regulan a participación nos tradicionais desfiles, tanto infantís como de adultos.
O primeiro gran evento chegará o sábado 14 de febreiro coa celebración do desfile infantil, que comezará ás 16.30 horas. Media hora antes abrirase o prazo de inscrición na Alameda, diante do Palco da Música.
Os máis pequenos percorrerán o itinerario habitual, desde a Rúa Real ata o Parque Eguren, pasando pola Praza do Reloxo, a Rúa do Sol e Concepción Arenal, onde lles agarda unha gran festa pensada especialmente para eles.
Poderán participar nenos e nenas nados a partir de 2012, é dicir, menores de 14 anos. As persoas adultas poderán acompañalos, sempre disfrazadas, cun máximo dun adulto por cada catro cativos. O xurado terá en conta aspectos como a orixinalidade, o vestiario, a actitude, o ritmo e a animación.
En xogo haberá 16 premios repartidos entre categorías individuais, parellas, grupos e comparsas, cun total de 1.860 euros.
O domingo 15 de febreiro será a quenda do desfile de adultos, que arrancará ás 17.00 horas desde a Praza do Regueiro, con concentración media hora antes.
O percorrido atravesará a Avenida de Ourense, Praza de España, Almuíña, Jaime Janer e Concepción Arenal, para rematar no Parque Eguren.
Alí, o xurado anunciará os gañadores, premiando non só os mellores disfraces, senón tamén a capacidade de transmitir alegría, ritmo e espírito entroidesco ao longo do desfile.
Nesta xornada repartiranse premios en categorías individuais, de parellas, grupos e comparsas, cun total de 11.375 euros. Ademais, as comparsas e grupos que non resulten premiados poderán optar a axudas económicas de 100 e 75 euros, respectivamente.
A maiores, o Concello destina 6.500 euros en retribucións fixas para as comparsas participantes, segundo o número de integrantes e a súa presenza nos desfiles infantil e adulto.
Iso si, só poderán beneficiarse destas contías as primeiras 20 comparsas inscritas.
Toda a información detallada sobre requisitos, categorías e criterios de valoración pode consultarse nas bases publicadas na web municipal.
Engade Pontevedra Viva como fonte preferida de Google de balde
Mantente informado coas últimas noticias de actualidade.