O deporte gaña terreo en Meis cun novo impulso económico da Deputación. O deputado provincial Javier Tourís visitou este xoves o pavillón municipal do Mosteiro para anunciar unha nova actuación que permitirá ampliar e modernizar as instalacións deportivas do municipio.
A institución provincial aprobará na Xunta de Goberno deste venres unha achega de 104.572 euros destinada á construción dunha pista de pádel e outra de pickleball na contorna do pavillón.
Trátase da totalidade dos fondos que lle corresponden a Meis ao abeiro do III Plan Extraordinario de Infraestruturas Deportivas impulsado pola Deputación de Pontevedra.
Este plan, dotado con 8 millóns de euros, está dirixido aos concellos da provincia de menos de 50.000 habitantes co obxectivo de fomentar a creación de novos espazos deportivos e mellorar os xa existentes.
No caso de Meis, os traballos centraranse principalmente na construción das novas pistas, pero tamén na posta en valor da contorna.
O proxecto inclúe a preparación do terreo para un novo pavimento, a execución de muros de contención, a instalación da rede de pluviais e soleiras de formigón, así como a montaxe das propias pistas.
Ademais, acometerase a sinalización do espazo e o pintado de novas prazas de estacionamento, contribuíndo a unha mellor organización e humanización da zona.
O deputado destacou o compromiso da Deputación coa modernización das infraestruturas deportivas en toda a provincia.
Engade Pontevedra Viva como fonte preferida de Google de balde
Mantente informado coas últimas noticias de actualidade.