O Mercado Creativo arranca na Praza de Abastos de Pontevedra cunha decena de citas ata abril de 2026

O primeiro andar da Praza de Abastos de Pontevedra encheuse este sábado de creatividade, cor e bo ambiente coa estrea do Mercado Creativo.

Trátase dunha nova iniciativa que converterá este emblemático espazo nun punto de encontro entre arte, cultura e gastronomía.

Este evento, que terá dez edicións ata abril de 2026, promete achegar vida e orixinalidade ao mercado cunha programación chea de actividades e propostas para todos os gustos.

A primeira xornada deu o pistoletazo de saída este sábado, con 13 postos de creación local e o ritmo de Los Tónikash, que puxeron banda sonora a un vermú moi especial que se estendeu ata as 15:00 horas.

As próximas citas xa están marcadas: os días 8 e 22 de novembro, 31 de xaneiro, 14 e 28 de febreiro, 14 e 28 de marzo, e 11 e 25 de abril.

Cada unha delas contará con novos expositores, propostas culturais, actividades paralelas e concertos de bandas locais que encherán de vida este espazo tan querido polos pontevedreses.

O Mercado Creativo non esquece aos máis pequenos. Como complemento, haberá actividades infantís para garantir a diversión de toda a familia, como o xa coñecido e exitoso Ganapán, que se celebra os sábados pola mañá e abre inscricións cada mércores.

Se es artista ou deseñador e che gustaría formar parte desta experiencia, o Concello de Pontevedra ten as inscricións abertas e de balde.

Podes anotarte a través do formulario da web municipal (no apartado "Apúntate") ou enviando un correo a [email protected]. As prazas son limitadas.