A gran final da oitava edición de 'En ASPACE cociñamos xuntos', o concurso de cociña no que participan persoas con parálise cerebral, contará cun escenario de excepción.
O mercado de abastos de Pontevedra acollerá a competición entre os finalistas deste certame. Será este mércores 4 de xuño, a partir das doce do mediodía.
Así o anunciaron a edil responsable da área de benestar social, Anabel Gulías, e o xerente de Aspace Galicia, Nacho Pérez, que celebraron que o mercado pontevedrés se vaia a converter nun espazo "único e inclusivo" con este evento.
As persoas finalistas que se clasificaron nas catro semifinais desenvolvidas ao longo do pasado mes de maio competirán por facerse co mellor prato do concurso.
Para iso terán que preparar propostas gastronómicas con conservas de peixe, atún, sardiñas ou agullas, ao estilo tradicional e con pratos texturizados ou triturados para comensais con dificultades para deglutir os alimentos.
Ademais, cada persoa usuaria participa en base ás súas capacidades. Mediante o uso de diferentes mecanismos, todos eles poden involucrarse no proceso de cociñado.
"Queremos mostrar que as persoas con parálise cerebral son persoas con capacidade para facer calquera cousa que se propoñan", destacou Nacho Pérez.
Do oito finalistas só dúas parellas ou tríos serán os gañadores.
Os participantes son usuarios da Asociación de Familias de Persoas con Parálise Cerebral de Vigo, Amencer-Aspace (Pontevedra e Vilagarcía), Aspace Coruña (Sada) e Aspace Lugo.
Todos eles deberán afrontar unha carreira contrarreloxo e presentar o seu prato no prazo fixado, entre unha hora e unha hora e media, o mesmo co que chegaron até esta gran final de Pontevedra.
Un xurado formado por Julio Mato, cociñeiro e presentador de A voltas co prato; Iñaki Bretal, chef do restaurante O Eirado; e Juan Permuy, blogueiro en El hambre con las ganas de beber, terá a difícil tarefa de escoller ás persoas gañadoras.
Anabel Gulías destacou que espera que este concurso se converta nun "imprescindible" da programación do mercado, ao tratarse dunha cita ideada "con moito agarimo e moito amor" e que encaixa cos valores que promove o Concello de Pontevedra.