Unha moza de 22 anos resultou ferida leve despois de que unha árbore caese sobre o vehículo que conducía no lugar de Cesariños, na parroquia de San Andrés de Cesar, no municipio de Caldas de Reis.
Segundo informan desde o servizo de Emerxencias do Concello de Cuntis, o suceso produciuse nun contexto de forte inestabilidade meteorolóxica.
O accidente tivo lugar pouco despois das tres da tarde na estrada provincial EP-8008.
As imaxes do accidente mostran o vehículo con importantes danos materiais tras o impacto da árbore, que caeu directamente sobre a carrozaría.
A pesar da aparatosidade do sinistro, a condutora non sufriu lesións de gravidade.
Ademáis de Protección Civi de Cuntis, até o lugar desprazáronse efectivos dos Bombeiros do Salnés, persoal sanitario do 061 e axentes da Garda Civil, que se encargaron de atender á ferida e asegurar a zona.
O incidente enmárcase no episodio de adversidade meteorolóxica asociado á borrasca Nils, que está a deixar este mércores unha xornada marcada polo temporal marítimo, choivas e refachos de vento moi fortes.
A Axencia Estatal de Meteorología (Aemet) activou o aviso vermello, que implica perigo extraordinario, nas costas galegas durante a noite, alerta que continuará na madrugada do xoves e estenderase a Cantabria e o País Vasco.
Segundo as previsións, este episodio de choivas e inestabilidade prolongarase até o venres, cando comezará a remitir.
