Desde inicios de 2026, os temporais non deron tregua, deixando un dos xaneiros máis chuviosos desde que existen rexistros, segundo a AEMET.
Agora, a poucos días da celebración do Entroido, a cidadanía permanece expectante ante a posible chegada dun anticiclón procedente dos Azores.
Esta festa, caracterizada por desfiles e comparsas nas rúas de diferentes localidades da zona, podería verse afectada polas condicións temporais que estamos a atravesar.
Con todo, a predición de Meteogalicia para os próximos días permite ver unha luz ao final do túnel. Mentres este mércores se experimenta a chegada de Nils, unha nova borrasca, a oitava deste ano, con avisos laranxas en toda a costa galega; o xoves e venres continuarán as alertas por ventos e choivas.
Despois do venres 13, día de inestabilidade atmosférica no que baixarán as temperaturas considerablemente a medida que avanza a tarde, chega o primeiro día do Entroido, con numerosos desfiles programados en toda a provincia. O 14 de febreiro estará principalmente influenciado pola presenza das altas presións que entran polo suroeste.
O anticiclón será case momentáneo, favorecendo especialmente a tarde do sábado, que estará marcada por ceos claros.
As choivas desaparecerán ao longo da mañá e volverán aparecer debilmente cara á noite, en forma de fronte cálida.
A partir do domingo, volverán ser protagonistas os chuvascos polo que, de momento, non se asegura un tempo estable para os seguintes días de festa. A comezos da próxima semana, polo de agora, a probabilidade de choiva é dun 90% e as temperaturas ascenderán.