O Concello de Pontevedra instalou gobos de iluminación en tres lugares emblemáticos da cidade -a Praza de España, o cruzamento de Benito Corbal con Daniel de la Sota e a Praza da Ferraría- proxectando a imaxe do Loro Ravachol, símbolo do Entroido en Pontevedra.
Esta proposta anuncia a chegada do Entroido, que dará comezo este venres 13 de febreiro e dedicarase a Castelao.
As actividades que abren e pechan a festa terán lugar na Praza da Ferrrría, onde se celebrarán o pregón e a queima do loro.
Este ano, a celebración rende homenaxe a Alfonso Daniel Rodríguez Castelao, como motivo do 75 aniversario da súa morte.
A súa figura está representada na ilustración do Entroido, creada polos estudantes do centro profesional 'O Garaxe Hermético'.
O cartel, deseñado por Jose Iglesias, reinterpreta unha fotografía clásica do galeguista pintando as máscaras de 'Os vellos non deben namorarse', substituíndo as máscaras orixinais pola de Ravachol, unindo así dous símbolos da cidade.
O concelleiro de Festas, Demetrio Gómez, describe este evento como "o mellor entroido urbano de Galiza", deixando o pregón en mans do grupo 'Os das pistas'. Ademais, o venres tamén se recibirá ao mitolóxico Rei Urco.
O Concello anima os residentes a participar nas diversas actividades programadas ao longo da semana, destacando o tradicional desfile do sábado 14, a Festa Pirata do martes 17 e o imprescindible Enterro de Ravachol o vindeiro sábado 21.