O Concello de Marín presentou este xoves a programación institucional deseñada para conmemorar o Día Internacional da Muller. Nesta edición, o goberno local centra as actividades no colectivo que integra o Servizo de Axuda no Fogar (SAF), baixo o lema “SAF, os coidados que melloran vidas”.
A alcaldesa, María Ramallo, acompañada polas concelleiras Marián Sanmartín e Mónica Viqueira e integrantes do Centro de Información á Muller (CIM), detallou a realidade numérica deste sector no municipio.
O servizo conta cun cadro de persoal de 60 persoas, das cales 59 son mulleres. Este equipo humano realiza un total de 5.000 horas de traballo ao mes, atendendo as necesidades de persoas en 90 fogares diferentes da vila.
A xornada do 8 de marzo terá o seu punto de encontro no Museo Municipal Manuel Torres ás 12:30 horas.
Durante este acto, procederase á lectura dunha declaración institucional e proxectarase un documental centrado na práctica diaria desta ocupación.
A peza audiovisual conta coa participación directa de tres traballadoras do servizo: Teresa Edreira, Lila Anaya Becerra e Saida Omar, quen expoñen a súa experiencia profesional ante a cámara.
Como complemento á parte de recoñecemento público, a campaña inclúe unha vertente de saúde laboral.
O 10 de abril, o Centro de Saúde de Marín acollerá un obradoiro de prevención do esgotamento profesional, coñecido como burnout. Esta sesión formativa está deseñada para que as traballadoras adquiran ferramentas de autocoidado ante a carga física e a xestión emocional que require a súa actividade diaria nos domicilios.
A programación do 8M esténdese tamén ao ámbito escolar a través de diversas propostas destinadas a alumnado de Primaria, que participará en obradoiros baixo o título “Un día axudando na casa”.e tamén estudantes de ESO e Bacharelato coa iniciativa de formación e sensibilización denominada “Radar: Level Up”.
No apartado visual, a exposición fotográfica “Mans Coidadoras” permanece instalada no vestíbulo do Concello ata o día 6 de marzo.
Tras esa data, a mostra trasladarase ao Museo Torres para coincidir coa celebración do acto institucional do día 8.