Os nenos despídense das Festas da Peregrina até o verán que vén

Aínda que moitas persoas entenden que a tirada de fogos de lucería marca o fin das Festas da Peregrina, a auténtica traca final constitúea o Día do Neno.

Esta xornada de luns a gran maioría das atraccións instaladas na Alameda, Montero Ríos e Raíña Vitoria rebaixaron os seus prezos.

Aínda que non participan desta oferta á baixa todos os feirantes, algunhas tómbolas e churrerías manteñen os prezos.

É tamén un día de complicadas negociacións, entre os que queren montarse en todo e as maltreitas carteiras de pais ou avós que tentan limitar o gasto a dous ou tres cacharriños.

E é que, aínda que hoxe os prezos das atraccións redúcense considerablemente seguen sendo moi caras as fichas, segundo o comentario xeneralizado dos clientes.

Os máis pequenos da casa gozaron desta xornada nun último esforzo para as familias despois de toda unha semana de festa.

O scalextrix, as camas elásticas, o touro mecánico, a nora, estaban entre o máis demandado.

Despois deste día extra toca recoller para poder reabrir as rúas ao tráfico este mércores.