Case 2.300 puntos de luz. Son os que, desde este mércores, cambiará a empresa Setga na iluminación pública da zona centro da cidade, incluídos os barrios da Parda e O Gorgullón. En todos eles instalaranse luminarias LED de última tecnoloxía.
Estes traballos, que durarán preto de seis meses, comezaron na Glorieta de Compostela e iranse estendendo progresivamente por todo o ámbito de actuación, segundo indicou o presidente da compañía, Ángel González.
"Imos atopar unha cidade cambiada pola noite cunha calidade de luz que nos permitirá observala con moita máis beleza", explicou.
Pero o máis importante, sen dúbida, é que esta nova iluminación permitirá un aforro próximo ao 70% na factura da luz, algo máis de millón e medio de euros ao ano, e reducir o seu mantemento ao aumentar a vida útil destas luminarias.
Así, "s4 antes tiñamos que cambiar as lámpadas cada tres anos", as novas, que son LED de máxima potencia, teñen 100.000 horas de vida, polo que aos 25 anos "estarían aínda no 90% do seu rendemento".
Estes puntos de luz terán unha temperatura de cor "neutra cálida" e, segundo González, "contaminarán moitísimo menos" ao ter luz controlada, é dicir, "coloca toda a luz que produce onde ten que estar, que é na rúa e nas prazas".
Ademais de cambiar as luminarias e deixar "como novos" todos os puntos, instalaranse farois ou lámpadas novas alí onde fagan falta unha renovación, do mesmo xeito que sucederá co cableado ou cos cadros de luz correspondentes.
A todo iso, o alcalde de Pontevedra, Miguel Anxo Fernández Lores, sumou que se reforzará a iluminación nos pasos de peóns para garantir a seguridade dos viandantes, especialmente naqueles puntos máis transitados.
Con esta actuación, "o gordo de toda a iluminación" estará xa cambiada a LED, fóra dalgunhas zonas das parroquias de Salcedo e Tomeza e case todo o centro histórico, que será abordado nunha intervención con maior realce artístico.
"Estamos ante un salto adiante na calidade da iluminación e tamén no aforro enerxético. Estamos encantados", sentenciou Fernández Lores.
Os 2,3 millóns de euros que se investirán nesta actuación poraos integramente a Deputación de Pontevedra con cargo ao convenio de colaboración que o executivo provincial asinou co Concello o pasado mes de marzo.
O seu presidente, Luís López, destacou a importancia das "alianzas entre administracións" para executar proxectos como este, "máis alá das discrepancias lóxicas que temos porque somos dous gobernos de cor distinta".
Ambas as dúas institucións mostran así, segundo López, o seu compromiso co aforro enerxético, coa sustentabilidade e con actuacións "que cambian a cara a unha cidade".
Engade Pontevedra Viva como fonte preferida de Google de balde
Mantente informado coas últimas noticias de actualidade.