Unha nova pasarela peonil de 72 metros potenciará a conexión segura entre Pontevedra e Marín

Este xoves, a conselleira de Vivenda e Planificación de Infraestruturas, María Martínez Allegue, visitou as obras que se están executando para a instalación dunha innovadora pasarela peonil na estrada PO-546, que conecta Mollavao cos Praceres, a coñecida como estrada vella de Marín.

A iniciativa forma parte dun proxecto para mellorar a mobilidade sostible e segura nesta zona.

Manuel Ángel González Juanatey, xefe do Servizo Provincial da Axencia Galega de Infraestruturas en Pontevedra, explicou que se están colocando os distintos tramos prefabricados de madeira laminada sobre unha estrutura metálica apoiada en micropilotes profundos. Antes disto, houbo que sanear un vertedoiro de lixo que había na zona para preparar unha cimentación sólida.

A pasarela ten unha lonxitude total de 72 metros e permitirá completar o tramo do rego de Louriña da senda peonil que conectará co camiño existente cara a ENCE.

González Juanatey engadiu que tras finalizar esta instalación, procederase coa pasarela de Sartáns, de maior tamaño, que tamén emprega a mesma tecnoloxía de micropilotes e módulos prefabricados. O custo desta fase é de aproximadamente 700.000 euros e espérase que estea terminada a finais de agosto ou principios de setembro.

Pola súa banda, a conselleira María Martínez Allegue destacou que a singularidade desta pasarela reside en que é prefabricada e instálase mediante izado con guindastres, "o que acelera considerablemente a súa execución".

Ademais, "estamos a impulsar o uso de técnicas industrializadas", non só en obra residencial senón tamén en obra civil, grazas ao convenio subscrito pola Xunta co clúster da construción.

Martínez Allegue subliñou tamén o uso de madeira laminada de piñeiro tratada, froito doutro convenio con XERA, que garante durabilidad e sustentabilidade na estrutura.

A conselleira subliñou que esta senda salvará puntos críticos e facilitará unha mobilidade continua, conectando moi pronto Pontevedra con Marín, a través dun percorrido de 3,5 quilómetros que conta cun investimento total de 6,8 millóns de euros.

A conselleira valorou a importancia desta infraestrutura para garantir a seguridade viaria nunha estrada con elevado tráfico vehicular, asegurando un espazo seguro para peóns e ciclistas.

Actualmente, a obra está executada nun 62%, e coa instalación destas pasarelas chegarase xa ao 80%. A empresa adxudicataria ten previsto concluír os traballos en outubro, aínda que conta con prazo até decembro.