O último pleno municipal de Pontevedra foi unha balsa de aceite, nunha sesión que se desenvolveu no medio dun debate político tranquilo marcado polos consensos. A excepción foi a controversia pola localización da pantalla xigante para ver a final do Mundial de fútbol.
A corporación deu luz verde a un novo convenio de colaboración coa Federación de Asociacións de Nais e Pais de Alumnos (FANPA) que asegurará o funcionamento das ludotecas de verán e Nadal durante o próximos catro anos, entre 2026 e 2030.
A subvención asignada alcanza os 456.777 euros e busca garantir a conciliación da vida familiar e laboral na cidade.
Unha das novidades destacadas do acordo é a incorporación dun incremento anual acumulativo do 2,5%, unha medida pensada para contrarrestar a perda de valor das contías fixas anteriores debido á inflación.
Esta actualización permitirá a FANPA contar con maior estabilidade financeira para contratar persoal técnico e adquirir materiais de lecer, reforzando así a calidade do servizo.
Por unanimidade, tamén se aprobaron os días festivos locais para 2027: o 10 de febreiro, coincidindo co Mércores de Cinza, e o 29 de marzo, na honra a San Cibrán, substituíndo así ao 11 de xullo, día de San Bieito, que caerá en domingo.
No pleno non faltou a discusión sobre a mellora urbana, pero nun ton sosegado e con disposición para chegar ao acordo.
As mocións do Partido Popular para revitalizar as praias da cidade, optimizar a limpeza viaria e mellorar a xestión de residuos recibiron o respaldo unánime.
No entanto, o Bloque Nacionalista Galego aproveitou para destacar que moitas destas medidas xa están en marcha, anunciando ademais que a próxima semana a empresa Prezero presentará o proxecto técnico para a planta de compostaxe na Canicouva.
Pola súa banda, o grupo municipal socialista logrou sumar apoios para ampliar as actuacións no barrio de Mollavao, buscando que a reforma transcenda a obra de Rosalía de Castro e se integre plenamente na trama urbana, elevando a calidade de vida dos seus veciños.
Os seus representantes asistiron ao debate para mostrar o seu "descontento" valorando "positivamente" que todos os grupos municipais coinciesen na necesidade de actuar no barrio e de dar resposta "ás numerosas carencias que arrastramos desde hai décadas".
Ademais, Monte Porreiro recibiu tamén respaldo para recibir investimentos planificados e servizos infraestructurales pendentes, conforme á moción presentada polo PP.
Finalmente, cos votos a favor de PSOE e BNG e o rexeitamento do PP, aprobouse unha moción para eximir do IBI ás comunidades de montes veciñais en man común, unha proposta curiosamente defendida polo Bloque na Deputación, aínda que alí contou coa abstención dos socialistas.
Engade Pontevedra Viva como fonte preferida de Google de balde
Mantente informado coas últimas noticias de actualidade.