Poio está a acometer a renovación integral da biblioteca municipal de Campelo cun investimento próximo aos 30.000 euros.
A actuación busca facer do equipamento un lugar máis cómodo, moderno e funcional para as persoas usuarias.
O alcalde, Ángel Moldes, e a concelleira de Cultura e Educación, Natalia Sabarís, supervisaron este mércores o avance desta intervención que permitirá mellorar a calidade do servizo.
Entre as actuacións figura a colocación dunha tarima flotante en toda a biblioteca, incluída a zona infantil, a sala de lectura, a área de computadores e o servizo de préstamo.
A intervención inclúe tamén a substitución do mobiliario, con novos estantes, mesas, cadeiras e mostrador, ademais de traballos de pintura e a reparación das humidades detectadas no teito.
Esta actuación completa o proceso de modernización do Concello iniciado nos últimos anos. Na fase anterior cambiáronse as xanelas para mellorar a eficiencia do edificio, instalouse un ascensor e habilitáronse baños adaptados para persoas con mobilidade reducida.
A mellora tamén afectará o local que utiliza a Escola de Acordeóns de Campelo, situado no mesmo inmoble que a biblioteca. Nese espazo substituirase a tarima, que presenta un avanzado estado de deterioración.
Moldes destacou que esta actuación é "un exemplo do compromiso do goberno local coa mellora continua dos servizos públicos".
A biblioteca permanece pechada mentres se realizan os traballos, pero as persoas usuarias poden seguir accedendo ao servizo de préstamo a través das Biblioplayas de Poio, situadas nos areais da Lamiña, Siorto e Cabeceira.