O colexio de San Benito de Lérez iniciou este xoves dous obradoiros dirixidos ao alumnado de quinto e sexto curso de Educación Primaria sobre as novas formas de violencia e a ciberseguridade.
Estas sesións teñen a finalidade de dar a coñecer ao alumnado os riscos aos que se poden expoñer na utilización das redes sociais en Internet, así como ensinarlles a detectar situacións de abuso, dotándoos de coñecementos que serven como ferramenta para protexer a propia identidade.
Serán nas horas lectivas do centro, cunha duración por taller de 100 minutos, a cargo da psicóloga Paula Rodríguez, experta en cyberbulling, trastornos de conducta, aprendizaxe e TDAH.
O primeiro taller estivo centrado nas novas formas de violencia (catfishing, stalking, doxing, sextorsion, grooming), que é o que pode pasar, qué é delito, chaves para protexer os dispositivos, consellos para saber que compartir e como a través da Internet.
Como manifestaba a psicóloga: “a ciberseguridade cobra sentido se coñecemos os riscos e que é un delito”.
No segundo obradoiro chamado “Coa Lupa no noso Mundo”, o alumnado converterase en detectives que terán que ir localizando, a través de diferentes medios, as pisadas do gran vilán “Mr Machismo”. Revisaranse os micromachismos a través da súa propia xerga e linguaxe preadolescente, os carteis de publicidade, as mensaxes das cancións que escoitan e os videoxogos aos que xogan, etc.