Está previsto que nos próximos días comece a funcionar o aparcamento de autocaravanas situado no Paseo da Calzada. Segundo o goberno local están a acometerse os últimos detalles para que poida entrar en funcionamento en moi breve prazo de tempo.
Este espazo atópase situado nas proximidades da praia fluvial, a única con bandeira azul de toda España. Con esta nova instalación, o alcalde Andrés Díaz afirma que se está facendo unha aposta para a chegada de turismo de calidade ao municipio.
Neste espazo, os visitantes poderán durmir e gozar dunha zona natural, ao mesmo tempo que poden contar con todos os servizos do centro urbano. A intención do goberno local é que estes turistas realicen compras no comercio da vila e consuman nos establecementos hostaleiros.
Díaz asegura que o turismo de autocaravanas é de calidade e cun perfil familiar, ademais de ser respectuoso co medio ambiente e que busca lugares de tranquilidade.
Segundo a normativa, as autocaravanas poderán estacionar na zona habilitada do Paseo da Calzada durante un máximo de 72 horas e poderán realizar o baleirado dos depósitos na instalación que se atopa en Chan da Barcia. Estes visitantes tamén poderán facer uso dos aseos gratuítos situados no "chiringuito" da praia fluvial.