Os primeiros días das Festas da Peregrina encheron Pontevedra. A cidade leva todo o verán cunha elevada afluencia de visitantes e durante a fin de semana mesmo aumentou, sendo "un éxito desde o punto de vista da afluencia de persoas".
O balance realizouno este luns o alcalde de Pontevedra, Miguel Anxo Fernández Lores, que asegura que "a cidade está petada todos os días", con gran afluencia a todas as actividades e tamén presencia de turistas.
Respecto diso, o rexedor fixo especial mención ao Camiño Portugués a Santiago, que "ten un gran futuro" e redunda nunha "actividade económica importante na cidade".
Insistiu, ademais, en que esta "grandísima afluencia de xente", é algo "bo para toda a cidade".
Ademais, Lores destacou que a cidade está repleta de persoas e, a pesar de todo, os primeiros días das festas transcorreron "sen case ningún tipo de incidente salientable".