Durante a mañá deste mércores chegaron os resultados das análises efectuadas ás mostras recollidas o pasado luns na praia fluvial de A Calzada tras detectarse que as augas presentaban unha cor que non era a habitual. Estas análises confirmaron a presunción inicial dunha vertedura procedente da Estación Depuradora de Augas Residuais (EDAR) da Lama.
A este respecto, o Goberno Local mostrará a súa "firme oposición ante calquera agresión ó río e tomará cantas accións e denuncias correspondan para que non se volva a producir un incidente deste tipo". Da mesma maneira informou de que "o Concello de Ponte Caldelas emprenderá unha denuncia ante Medio Ambiente e Augas de Galicia co fin de que por parte desta administración se tomen as medidas oportunas e se teña o máximo coidado para que isto non se volva a producir".
Finalmente o goberno local de Ponte Caldelas apuntou nun comunicado "que atacar ao río de Ponte Caldelas e á súa praia fluvial é atacar directamente aos veciños e veciñas do noso municipio".
Durante esta mañá os técnicos de Saúde Ambiental da Xunta de Galicia xa procederon a recoller unha nova mostra que se espera que de cara ao venres poida confirmar que as augas volven á normalidade.