O Espazo Concilia, da concellería de Igualdade do Concello de Poio, púxose en marcha este luns cun amplo catálogo de talleres artísticos, contos ou deportivos para os máis pequenos da familia. A ludoteca permanecerá aberta ata o próximo 9 de setembro co obxectivo de facilitar a conciliación ás familias de Poio.
Esta ludoteca desenvólvese no CEIP Viñas, cuxas instalacións facilitan o cumprimento das normas sanitarias para previr os contagios por Covid-19.
"Tendo en conta o contexto no que nos atopamos, logo de varios meses de confinamento, entendemos que o Concello ten que ofrecer á veciñanza un servizo destas características, para permitir que a actividade laboral teña o menor impacto posible na conciliación familiar e ofrecer aos nenos e nenas un espazo lúdico e de socialización", indica a concelleira Silvia Diaz.
As actividades desenvólvense en horario de 8.30 horas a 14.30 horas para nenos e nenas de 3 a 12 anos. Actualmente son 26 os menores rexistrados nesta ludoteca, pero desde o goberno local explican que aínda quedan prazas dispoñibles.
As tarifas son de 25 euros ao mes para os meses de xullo e agosto, mentres que para setembro redúcese a 10 euros.