Carmela Silva, presidenta da Deputación, afirmaba este martes que solicitou unha reunión co director xeral de Dixitalización e Intelixencia Artificial Ángel Luís Aristi para tratar temas como o emprendido pola institución provincial da Rede Smartpeme que, segundo a presidenta provincial, será tomada como referente polo Goberno central para implementar noutras administracións unha fórmula que potencie o comercio local a través de formatos dixitais.
Precisamente, a presidenta presentaba nesta xornada a segunda aceleradora do comercio para potenciar a dixitalización das medianas e pequenas empresas (Pemes). A intención, explicaba Carmela Silva, é optimizar a competitividade e as posibilidades do comercio local da provincia a través da incorporación das novas tecnoloxías.
A iniciativa desenvolverase entre o 15 de xuño e o 15 de outubro e ofrecerase formación a Pemes, persoas emprendedoras, empresarias e autónomas da provincia que queiran reorientar os comercios tradionales ou poñer en marcha actividades vía en liña coa posibilidade de emprender novas iniciativas e promover con innovacións negocios xa existentes. As titorías serán personalizadas a través do equipo asesor de Smartpeme.
Nesta edición a formación será telemática pero van impartirse tamén sesións formativas grupais de forma presencial. Un total de dez empresas poderán participar. É preciso que as persoas interesadas se inscriban previamente a través da Deputación que manterá o prazo aberto ata o 7 de xuño.
Carmela Silva lembrou que o sector do comercio conta cunha forte presenza na provincia, segundo o Instituto Galego de Estatística con 12.664 empresas que se dedican a esta actividade. O 15% son empresas comerciantes polo miúdo e o sector viuse prexudicado especialmente con motivo da crise pandémica.