Un novo acto en Pontevedra da campaña electoral de Manuel Reigosa, único candidato á reelección como reitor da Universidade de Vigo, deixou novos detalles do proxecto estrela da institución para o campus da Xunqueira: o novo edificio nos antigos terreos de Tafisa.
Esta construción será unha das súas prioridades nas negociacións do plan de infraestruturas entre a Xunta de Galicia e as universidades galegas, segundo explicou nun encontro co profesorado e alumnado da futura Facultade de Dirección e Xestión Pública.
Reigosa asegurou que será unha "construción modular" que acollería tanto este centro como a futura Facultade de Deseño e que permitiría, sinalou, "achegarnos máis á cidade".
Acompañado pola súa candidata a vicerreitora do campus, Eva María Lantarón, o actual reitor engadiu que este novo edificio estará situado nunha parcela que será cedida polo Concello, co que "aínda non está asinado o convenio", pero si xa está "todo claro e traballado".
No referido ao mapa de titulacións, a universidade prevé que se permita a implantación de entre 12 e 14 novos graos "que non hai en Galicia", que para Manuel Reigosa "o lóxico é que se repartan polos sete campus, contribuíndo a xerar sinerxías coas titulacións xa existentes".
Neste punto, Reigosa apuntou que se a Pontevedra vén unha nova titulación que encaixe nun dos centros xa existentes "irá para esa facultade", pero se é un grao para o que pague a pena facer unha facultade propia, a idea sería poder "ir facendo máis módulos" na parcela de Tafisa.
De aí que a Universidade de Vigo pense en dispoñer dun espazo grande que, ademais, terá moita edificabilidade para afrontar posibles ampliacións.