Alfonso Delgado tocou o corazón de moitos españois o pasado ano interpretando a Manuel, o parado protagonista da dramática campaña de Lotería de Nadal que tanto emocionou á cidadanía.
Lembran: Antonio, o dono do bar ao que baixa Manuel todos os días a tomar café, dille, cando todo o bar está celebrando que alí tocou o Gordo, que o café custa 21 euros, porque lle reservara un boleto premiado.
Este actor, cunha traxectoria de máis de 30 anos, acaba de expresar o seu apoio á plataforma cidadá SOS Panadeira que loita para a retirada definitiva do pantalán que, segundo os seus portavoces, "invade, usurpa e destrúe" as praias urbanas de Panadeira e Iriña.
De maneira desinteresada Alfonso Delgado prestou a súa imaxe para que os integrantes de SOS Panadeira vendan participacións do seu décimo de lotería.
Desde esta plataforma agradeceron efusivamente o xesto do actor que xa "conta cun sobre pechado co seu décimo de SOS Panadeira".