Ata 325 solicitudes recibiu o Concello de Pontevedra de pequenas empresas interesadas en financiar investimentos con cargo ao Plan Supera21. Así o comunicou este luns a portavoz do goberno municipal, Anabel Gulías.
Aínda que recoñeceu que hai algunha solicitude duplicada que será retirada polos técnicos municipais, Gulías expresou a súa satisfacción pola resposta lograda con este plan.
Na convocatoria de 2020 concedéronse 166 axudas.
O Concello estima que o volume de solicitudes supoñerá esgotar os 600.000 euros que se reservaron para esta liña de subvencións.
A edil do BNG explicou que a intención do Concello é resolver tanto estas axudas como as destinadas a computadores das familias antes de que termine este ano.
No caso das empresas, o Plan Supera21 financiará a dixitalización e implementación de tecnoloxías dixitais, obras ou actuacións para a mellora na accesibilidade exterior e interior dos locais, a renovación, embelecemento e ornato dos establecementos, actuacións en eficiencia enerxética ou a adquisición de vehículos comerciais.