O propietario do restaurante italiano Il Piccolo de Pontevedra,Francesco Iannelli, ofreceu un show cooking de Italia Tartufi, no Recinto Feiral de Madrid-IFEMA durante a celebración da XXIX edición do Salón Internacional do Club de Gourmets. Este traballo realizouse inspirándose na temática gastronómica "Tartufo, oro della Terra in cucina".
Durante o transcurso desta actividade culinaria, a Cámara de Comercio Italiana entregaba o galardón "Marchio Ospitalità Italiana 2015" ao restaurante pontevedrés. Con este premio recoñécese a Il Piccolo por exercer de permanente embaixador en Galicia, España e Europa na promoción das tradicións agroalimentarias das distintas rexións italianas.
O restaurante italiano Il Piccolo leva máis de trinta anos de experiencia en Italia, Inglaterra, Francia e Portugal. Con este importante galardón continúa a súa brillante actividade gastronómica na cidade, promovendo Pontevedra dende hai máis de 15 anos en diversos ámbitos e foros, como sucedía o pasado 14 de abril en Madrid, coa realización do show cooking.