Constructora San José iniciou este mércores os traballos da segunda fase da intervención arqueolóxica proxectada na parcela destinada a tanatorio entre as rúas Uruguai e Arcebispo Malvar, unha actuación consistente na construción dun muro de micropilotes destinado a garantir a estanquidade do soar, seguindo as disposicións da Comisión Territorial de Patrimonio Histórico de Pontevedra, dependente da Consellería de Cultura da Xunta. A terceira fase permitirá completar a escavación de toda a área.
A empresa prevé empregar arredor de tres meses na instalación deste muro, dunha lonxitude estimada de 70,36 metros e unha profundidade aproximada de seis metros, e que abarcará os lindes Norte, Leste e Oeste da parcela.
A primeira fase da intervención arqueolóxica permitiu destapar un longo tramo de muralla medieval, de 34,57 metros de lonxitude. A actuación desenvolveuse na súa maior parte nos pasados meses de novembro e decembro, aínda que no último abril completouse para confirmar que os restos amosan vestixios dun posible baluarte defensivo no seu lado Leste e dunha especie de peirao que continuaría no soar lindeiro no extremo Oeste e que pode estar relacionado cun torreón.
As empresas promotoras do bautizado como Tanatorio das Correntes, Pompas Fúnebres e Alianza y Barros, estudan poñer en valor esa área acondicionándoa para o seu mantemento completamente ao aire, e confían en que a construción do edificio sexa compatible con esta idea.
Con este obxectivo redactan o corresponde proxecto de execución. Non obstante, ante calquera dúbida técnica ou funcional soterrarán os restos para garantir a súa total conservación.
Precisamente a opción de construír un muro de micropilotes e non un muro pantalla de formigón para pechar completamente o terreo e poder completar a escavación, escolleuse por ser a fórmula menos agresiva e que ofrece máis garantías para asegurar a perfecta conservación da muralla, a pesar de resultar economicamente moito máis cara. Caso de considerarse necesario habilitarase tamén o muro no linde Sur da parcela, onde se atopou a muralla, engadíndose outros 31,83 metros de parede.
A terceira fase da intervención arqueolóxica consistirá no control da retirada de terras durante a escavación do soar coa correspondente documentación e contextualización das posibles estruturas que aparezan. Parte de esta terceira fase, loxicamente, executarase ao mesmo tempo que a construción do muro de micropilotes, pois esta actuación xa implicará traballos de extracción de terra.