A Policía Local de Pontevedra detivo a pasada fin de semana un home que intentou obstaculizar unha proba de alcoholemia e logo acabou insultando e golpeando os axentes, ademais de gravalos co teléfono.
Segundo a información facilitada pola Policía Local, sucedeu na madrugada do pasado domingo, 26 de outubro.
Os axentes estaban nas inmediacións da Xefatura da Policía Local cando observaron un vehículo circulando a gran velocidade e cos intermitentes de emerxencia activados.
Tras darlle o alto, a patrulla entrevistouse coa condutora, que desprendía un forte alento a alcol.
Os axentes quixeron realizarlle a proba de alcoholemia e, nese momento, o copiloto arrebatoulles a boquilla precintada, argumentando que estaba contaminada.
Os axentes pedíronlle en diversas ocasións que devolvese a boquilla, pero fixo caso omiso e comezou a insultalos.
Acto seguido, apeouse do vehículo para enfrontarse contra un dos policías, chegando a golpealo no peito.
Debido á actitude moi agresiva e desafiante deste home, os axentes solicitaron o apoio de dúas patrullas adicionais, pero continuou enfrontándose aos policías. Ademais, gravou os axentes co seu teléfono móbil.
Segundo a información policial, dado que non atendía as indicacións para manter a distancia de seguridade, finalmente, procederon á súa detención polos presuntos delitos de agresión e resistencia á autoridade.
Cando xa tiña os grillóns colocados, segundo a información policial facilitada, chegou a autolesionarse dándose golpes no rostro contra a beirarrúa.
Finalmente, os axentes tiveron que suxeitalo para impedir que continuase coas autolesións e solicitaron a presenza dos servizos sanitarios.
Foi atendido nun centro sanitario e logo foi posto a disposición do xulgado de garda.