O Pazo da Cultura de Pontevedra retoma este luns unha das citas máis agardadas do Entroido, o Concurso de Murgas, un evento que tradicionalmente rexistra o cheo total no auditorio.
A primeira xornada de eliminatorias comeza ás 21.00 horas deste luns coas actuacións de Naveiro "Aberto en Canal"; Val do Lérez "Hoxe aquí, mañán alá"; Tropa de Moncha A Caralla e Os Trapalleiros..
A fase clasificatoria completarase o mércores 18, á mesma hora, coa participación de Equipo Ja, formación que defende o primeiro posto acadado en 2025, Jana de Leria: Arrombados e Leña Verde.
Cada agrupación dispón dun tempo máximo de 30 minutos para interpretar composicións de temática libre adaptadas ao estilo do Entroido, onde se avalía o contido humorístico da proposta.
As murgas que logren o acceso á final do xoves 19, que terá lugar ás 21:00 horas, tamén no Pazo da Cultura, optarán ás seguintes cantidades económicas:
PREMIOS
1º Premio: 1.200 euros e unha figura do Ravachol 2026
2º Premio: 1.050 €
3º Premio: 900 €
4º Premio: 750 €
5º Premio: 400 €
Ademais, cada formación participante recibe 250 euros.
No palmarés do último ano, tras o Equipo Ja, situáronse Os do Val do Lérez, Murga do Naveiro,'A Tropa de Moncha A Caralla e Leña Verde.
As persoas que non poidan asistir ao auditorio teñen a posibilidade de seguir o desenvolvemento do concurso a través da emisión por streaming de todas as fases a través da canle do Concello de Pontevedra.
Engade Pontevedra Viva como fonte preferida de Google de balde
Mantente informado coas últimas noticias de actualidade.