O Concello de Cuntis decidiu no pleno celebrado este xoves os festivos locais do ano 2022. Coa votación a favor do PSOE e do PP e a abstención de Veciñanza, estableceron o 11 de xullo (San Bieito) e o 17 de agosto (Día do Carme).
Ademais dese tema, tamén trataron a moción do grupo Veciñanza para a reforma e humanización da Rúa do Convento, onde tódolos grupos políticos votaron a favor de instar a administración autonómica a acometer os traballos precisos para comezar con esta reforma.
A rebaixa do prezo da luz foi outro dos temas a tratar, neste caso pola moción presentada polo Partido Popular. Neste caso, o Partido Socialista negouse debido a que o alcalde comentou que era "preciso deixar claro que estas medidas de regulación do mercado eléctrico eran obra do PP ante o que o PSOE tivo que intervir para rebaixar o IVE", polo que, parecíalle "un absurdo que este partido fose en contra dunha medida que eles mesmos implantaran".
Finalmente, tódolos partidos votaron a favor a moción do Grupo Veciñanza con respecto ao apoio das demandas da ANPA O Baño en defensa do ensino público e de calidade en Cuntis. Ademais instan á Consellería de Educación a que replantee a súa posición con respecto a este tema. Manuel Campos, alcalde de Cuntis, comentou neste caso que se trata de "outro recorte máis de servizos públicos á veciñanza de Cuntis por parte da administración pública, ante o que todos os partidos se opoñen".