O vindeiro sábado 27 de xaneiro todos os veciños da parroquia de Antas, na Lama, están convocados a unha asemblea aberta para analizar a segunda fase das obras de mellora na estrada PO-235.
A reunión está convocada polo alcalde da Lama, Jorge Canda Martínez, terá lugar no Casino de Antas a partir das 18.00 horas e, debido ao interese que suscita este tema, o rexedor solicita a máxima asistencia dos residentes na zona.
O encontro servirá para explicar aos veciños as liñas xerais do proxecto que está a redactar a Xunta e para tentar finalizar o proceso de identificación e localización dalgún dos herdeiros da propiedade dalgunha leira afectada polas obras.
Esta obra é unha reivindicación histórica do Concello da Lama e realízase en dúas fases. A primeira, xa licitada, implica a mellora da estrada PO-235 entre Antas e Seixido e ten un orzamento de case 600.000 euros.
A actuación ten un prazo de execución de seis meses, o obxectivo é iniciala no primeiro trimestre deste ano e consiste no ensanche e mellora desta estrada en varios puntos entre os núcleos de Antas e Seixido, co fin de mellorar a seguridade viaria e a comodidade na circulación.
As obras previstas na primeira fase comprenden a ampliación transversal dos pontóns situados nos puntos quilométricos 15+630 e 17+300, para conseguir un ancho de oito metros, o que permitirá ampliar a calzada e dispoñer beiravías e peitorís de contención. Ademais, mellorarase o trazado das curvas de acceso aos devanditos pontones, ampliando lixeiramente o seu radio.
O seguinte tramo, entre a saída do pontón do punto quilométrico 17+300 ata o final da vía, no núcleo de Seixido, tamén se ampliará e estenderase no firme unha nova capa de rodaxe. Para a drenaxe da plataforma, ademais de ampliar as obras de drenaxe que resulte necesario, procederase ao tendido e revestimento das cunetas, nos tramos que resulte conveniente.
Procederase tamén a reposición da rede de saneamento existente no núcleo de Seixido, que se ve afectada pola obra e a disposición de sinalización horizontal, vertical e de balizamento e defensas.