O goberno municipal de Soutomaior está decidido a seguir avanzando na humanización dos principais espazos públicos de Arcade.
Desta volta, as obras chegarán á Rúa Roxelio Landeiro e a todo o ámbito urbano que conforma a baixada cara a Ponte Sampaio.
Esta "transformación radical", como a definiu o alcalde de Soutomaior, Manu Lourenzo, será financiada polo Plan Extra da Deputación de Pontevedra.
Será posible despois de que a Xunta ceda ao Concello este treito da actual PO-264.
A estrada é unha rúa que presenta, segundo Lourenzo, un "evidente estado de deterioro" e ademais, debido ao tráfico de vehículos e ausencia de beirarrúas "dignas", entende que supón unha "hipoteca" para o desenvolvemento de Arcade.
A actuación proposta implica converter e transformar ese espazo nun núcleo urbano acorde á contorna, a ponte de Ponte Sampaio.
O pavimento terá materiais nobres como pedra e adoquín e conforme se vaia achegando a Arcade vaise a producir unha transición entre o que é a zona histórica e a zona máis moderna.
Nesta última haberá un tratamento urbano marcado por elementos verdes, plataforma única e mobiliario urbano, para favorecer a vida das persoas "fronte ao caos do tráfico actual".
"Con esta actuación continuamos coa transformación urbana de Arcade", sostivo o alcalde, que quere que Soutomaior "non quede atrás" e poida contar con espazos "sostibles e agradables".
O rexedor tamén quixo agradecer o traballo dos funcionarios, técnicos e todas as persoas que están traballando "sen descanso", para sacar adiante esta transformación urbana, xa que na actualidade, lembrou, "temos na rúa máis de 4 millóns de euros en obras".
