A escena sorprendeu a quen aínda transitaban pola cidade de madrugada. Eran as 00:45 cando dous vehículos da Policía Nacional, xunto a voluntarios de Protección Civil, trataban de cercar a un xabaril de gran tamaño que deambulaba pola zona urbana.
Para evitar riscos, foi necesario regular o tráfico e así impedir que o animal irrompese na calzada.
Durante varios minutos, o exemplar moveuse pola Praza 8 de Marzo, onde está instalada unha estatua da mascota do Salón do Libro o lobo Orbil, antes de dirixirse cara á estación, seguido de cerca polos equipos de emerxencia.
Este episodio non é un feito illado. Nos últimos anos, a presenza de xabarís en Pontevedra creceu de forma notable, con avistamentos cada vez máis frecuentes en espazos urbanos como a Alameda. Algúns destes animais, mesmo de gran tamaño, foron vistos en pleno centro da cidade, o que reflicte a súa progresiva adaptación a contornas humanizadas.
As consecuencias desta convivencia non sempre son menores. Rexistráronse incidentes de tráfico vinculados á irrupción de xabarís na calzada.
Galicia conta cunha das maiores densidades de xabarís da península, cunha poboación que supera os 82.000 exemplares. Este crecemento, unido á facilidade para atopar alimento en zonas periurbanas, favoreceu que estes animais se acheguen cada vez máis a núcleos habitados, incrementando os encontros con persoas.
Ante esta situación, as autoridades insisten en seguir unhas pautas básicas de seguridade como manter a distancia, non alimentar aos animais, facer ruído para disuadilos e avisar ao 112 si a súa presenza supón un perigo, especialmente en estradas.
Engade Pontevedra Viva como fonte preferida de Google de balde
Mantente informado coas últimas noticias de actualidade.