Unha persoa sufriu un golpe na cabeza tras un accidente ocorrido este mércores na autoestrada AP-9, presuntamente provocado por acumulación de auga na calzada, nun novo episodio vinculado á inestabilidade meteorolóxica dos últimos días.
A vía rexistrou varias colisións múltiples en xornadas recentes, relacionadas con granizadas e outras condicións adversas.
O sinistro produciuse pouco despois das 9:00 horas no quilómetro 109, en dirección a Pontevedra, preto da saída cara a Caldas.
Segundo informaron desde Emerxencias de Cuntis, o condutor, que era o único ocupante do vehículo, perdeu o control ao atoparse con auga acumulada e chocou contra a mediana, quedando atravesado na calzada cun forte golpe na parte dianteira do coche.
Non se viron implicados outros vehículos.
O ferido foi trasladado en ambulancia do 061 a un centro sanitario para recibir atención médica.