As Festas de San Xoán 2025 xa teñen pregoeira. Será Pilar Martínez Soto, veciña do Sartal, a que marcará o inicio unha das citas máis esperadas e emblemáticas do calendario festivo de Poio, que se celebrará entre os días 22 e 27 de xuño.
Esta muller, destaca o goberno municipal, representa unha figura moi querida e vinculada á vida cultural, social e educativa do municipio. Filla de tres xeracións de taberneiros, pola súa casa pasaron practicamente todos os veciños de Poio.
Profesora de Educación Infantil, comezou a súa traxectoria facendo prácticas no CEIP Isidora Riestra, pero foi no CEIP de Chancelas onde finalmente conseguiu praza fixa, centro no que continúa a desenvolver a súa vocación docente.
O seu vínculo co San Xoán vén de moi atrás, dende a infancia, cando o entorno do mosteiro era o seu centro cultural e o corazón das festas.
Para Pilar, San Xoán significa música, diversión, gaiteiros, comidas especiais e fogueiras.
Lembra con emoción os carros que percorrían pola noite as rúas facendo trasnadas e as casas cheas de xente grazas á chegada dos "festeiros", pero un dos seus recordos máis vivos está ligado ás herbas de San Xoán.
Foi a nai da curandeira que a asistiu no parto quen lle transmitiu a paixón pola recollida das herbas para facer o cacho, unha tradición que ela mantivo toda a vida e que soubo contaxiar a novas xeracións.
"Aínda cando non vivía en Poio sempre volvía polo San Xoán", confesa unha pregoeira para quen este recoñecemento "supón unha auténtica satisfacción e un orgullo, pero tamén unha gran responsabilidade e un reto".
Dende o Concello de Poio apostan por escoller como pregoeiras a persoas cunha vinculación real e directa co municipio e coa tradición do San Xoán, poñendo en valor a veciñas e veciños que, de forma directa ou indirecta, contribúen a manter viva a identidade e a memoria colectiva do pobo.