A Xunta de Galicia deulle luz verde á Autorización Ambiental Integrada para a nova fábrica de fibra reciclada blanqueada que Ence vai montar na localidade coruñesa das Pontes, segundo aparece no Diario Oficial de Galicia.
Este paso é clave para a empresa, xa que o proxecto foi declarado estratéxico pola propia Xunta en 2023.
Nestas instalacións realizaranse dous procesos: a reciclaxe de papel e cartón e a fabricación da pasta de celulosa, coa finalidade de obter unha produción de arredor de 100.000 toneladas ao ano.
Con esta autorización, Ence porá en marcha unha planta que, segundo asegura a compañía será "pioneira a nivel mundial" e producirá fibra reciclada blanqueada usando papel e cartón recuperados.
Así, danlle unha segunda vida a estes materiais e apostan pola economía circular.
A planta funcionará con enerxía renovable xerada a partir de restos da industria forestal local, sen usar combustibles fósiles.
A fábrica será a primeira do sector en usar tecnoloxía de branqueo totalmente libre de cloro (TCF) aplicada a fibras recicladas. É dicir, converterán papel e cartón usados en produtos de gran valor, sen contaminar.
Ademais, esta planta levantarase nos terreos dunha antiga central térmica de carbón, o que a compañía interpreta como "un reforzo do seu compromiso cunha transición xusta e o desenvolvemento local".
Ao mesmo tempo que desenvolve a planta, Ence tamén está a traballar en Regatex, unha planta piloto para reciclar téxtiles. Este proxecto busca crear unha nova forma de reciclar roupa e outros tecidos.
En 2024, Ence asinou un acordo coa startup sueca Sharetex para colaborar neste tema. Grazas a esta alianza, lograron sacar celulosa reciclada de tecidos de polialgodón (unha mestura de algodón e poliéster moi común na roupa), un material que até agora era moi complicado de reciclar de forma eficiente.
Este avance podería cambiar as regras do xogo na reciclaxe téxtil e axudar a escalar solucións sostibles no sector.
TRAMITACIÓN
A resolución emitida pola Dirección Xeral de Calidade Ambiental e Sostibilidade sae publicada este martes no Diario Oficial de Galicia co que, superado este fito, o expediente volverá á Consellería de Economía e Industria, como órgano substantivo, encargado de tramitar o conxunto do proxecto e de autorizalo en última instancia.
Ademais encargarase de velar, en caso de saír adiante, polo cumprimento das exixencias ambientais recollidas tanto nos distintos informes sectoriais como na propia declaración de impacto ambiental (DIA) e no plan de vixilancia ambiental que é de aplicación ao proxecto.
Desde a Xunta de Galicia destacan que este trámite complétase despois de que en maio a Consellería de Medio Ambiente e Cambio Climático emitise a DIA favorable, condicionada ao cumprimento das exixencias recollidas tanto nos distintos informes sectoriais emitidos sobre o seu impacto como na propia DIA co fin de minimizar e compensar os posibles efectos na contorna.
Esa declaración de impacto ambiental foi o resultado de 18 informes sectoriais favorables ou favorables condicionados ao seu desenvolvemento neste concello coruñés.
Recalcan dende a Xunta que "trátase dunha tramitación exhaustiva, rigorosa e garante da preservación dos distintos elementos que é preciso protexer no que se inclúen pautas ao promotor sobre como se debe desenvolver o proxecto para que sexa ambientalmente autorizable e viable, unha cuestión na que incide tamén a autorización ambiental integrada".
A culminación dos trámites ambientais e as correspondentes resolucións favorables non eximen ao promotor da obriga de obter todas as autorizacións, licenzas, permisos ou informes que sexan legalmente exixibles para a execución e funcionamento do proxecto.