A parroquia de San Salvador, en Poio, pasará a contar nos próximos días con novos composteiros. Ademais o da contorna de Ferreirós será ampliado.
A concelleira de Servizos, Chelo Besada, visitou este luns o lugar acompañada do edil de Urbanismo, Gregorio Agís, para explicar que "dada a gran resposta por parte da cidadanía á hora de facer uso destas instalacións, entendemos que é necesaria esta ampliación". Esta razón xustifica tamén a decisión de implantar novos equipos noutros puntos da parroquia.
Nos últimos días, os operarios municipais finalizaron os traballos para a posta a punto das bases destes composteiros. Agora permanecen á espera da Deputación para recibir os novos depósitos.
Lembran desde o goberno local que os rexistrados no programa de compostaxe poden poñerse en contacto coa mestra composteira ou o Concello para recibir o seu saco de compost.