O alcalde de Poio, Ángel Moldes, reuniuse este luns con veciños da Caeira para coñecer de primeira man as súas preocupacións polos desvíos de tráfico previstos con motivo das obras de transformación da PO-308 na Avenida da Barca.
Durante o encontro, o rexedor admitiu que este tipo de actuacións adoitan provocar molestias no día a día da poboación, aínda que apelou á paciencia e á comprensión cidadá.
Moldes subliñou que se trata dunha intervención "necesaria", destinada a xerar un impacto positivo e duradeiro na calidade de vida da veciñanza.
O alcalde comprometeuse a aproveitar o parón das obras durante as festas do Nadal para reforzar a sinalización na zona afectada.
Ademais, avanzou que, unha vez se retomen os desvíos a partir do 12 de xaneiro, tamén se intensificará a vixilancia no lugar.
Nese sentido, lembrou que o plan de tráfico é un documento "vivo", susceptible de modificacións para adaptarse ás necesidades e reducir as molestias á cidadanía.
O Concello de Poio reiterou así o seu compromiso de manter o diálogo coa veciñanza e de traballar para que o desenvolvemento das obras teña o menor impacto posible.
O obxectivo final é mellorar a mobilidade e os espazos públicos do municipio, insistiu o alcalde.
Engade Pontevedra Viva como fonte preferida de Google de balde
Mantente informado coas últimas noticias de actualidade.